Eventos e Manifestatziones


Presentatzione de su libru "I Pirella. Origine e ascesa di una famiglia della Nuoro feudale" de Salvatore Pinna.

Archìviu de Istadu, Sala de Istùdiu, 19 de nadale 2018.




Sa locandina de s'eventu

Su 19 de nadale a sas 4 de borta de die in sa sala de istùdiu de s'Archìviu de Istadu, su dutore Raffaele Cau, archivista e istòricu, at a presentare su libru "I Pirella - Origine e ascesa di una famiglia della Nuoro feudale" de Salvatore Pinna. Su libru, pro more de un'istùdiu apassionadu e rigorosu de sas funtes primàrias (meda de custas mai publicadas) collidas in sos archìvios istòricos sardos e ispanniolos, torrat a percùrrere sa genealogia de sa famìlia Pirella de Nùgoro dae su sèculu su de XVI a su sèculu su de XX. At a sighire sa presentatzione de s'artìculu "La Inquisición en la villa de Nuoro. Perdita Basigheddu e altri dimenticati" iscritu dae su matessi autore, e publicadu in sa rivista "Sardegna antica" (nùmeru 54). Ammentamus a sos impitadores chi sa die sa Sala de Istùdiu serrat a mesu die.

_____________________________


Amparu e valorizatzione de sos pabiros.





Pro s’ocasione de sa manifestatzione natzionale Domenica di carta 2018 s’Archìviu de Istadu de Nùgoro presentat a su pùblicu sas fainas istitutzionales chi pertocant a s’àmparu e a sa valorizatzione de sa sienda documentale. Si ant a pòdere bisitare sos depòsitos, e in sa sala de istùdiu, si ant a pòdere a bìdere sos istrumentos de corredo in pabiru e digitales fatos in chimbant’annos de atividade de s’Istitutu.

___________________________________


 

Presentatzione in s'Archìviu de su libru 

"Custu est unu paradisu terrestre" 

de Piera Porcu

 

Sa locandina de s'eventu


Sa die 14 de cabudanni 2018 a sas 5.30 de sera in sa sala de istùdiu de s'Archìviu de Istadu de Nùgoro, s'editore dutoressa Nèria de Giovanni e s'iscritore dut. Diego Satta ant a presentare su libru "Custu est unu paradisu terrestre" de sa iscritora Piera Porcu - Nemapress, 2017.
Si tratat de unu contu autobiogràficu inue s'autrice nos acumpàngiat intro sa vida pastorale de una famìlia chi, dae Orune, in su tzentru de sa Sardigna, si nche andat in àteros giassos de s'Ìsula, in sos annos chi andant dae prima de sa gherra fintzas a sa riforma agrària, peri bator generatziones. S'intrìtzant istòrias de dolu e de balentia, de amistade, de fratellàntzia, de disterru e de amore. Dae sa Barbàgia a su campu de Utieri e fintzas a sa bidda de Tula, inue sa iscritora bivet galu oe. Custu romanzu corale oferit fintzas ritos e usos de su pòpulu sardu, cun s'incantu de sa traditzione chi fintzas oe si agatat in sas biddas de intro, e bivet in s'ànima de chie amat sa Sardigna.


 __________________________________

 

IN CHIRCA DE GIAJOS E BISAJOS

Parte Segunda

Da te ai tuoi antenati

Cras, martis 14 de abrile a sas noe e mesu de mangianu at a comintzare sa segunda parte de su cursu de geneaologia chi s'Archìviu de Istadu de Nùgoro at ammaniadu paris cun sos Professores Maurizio e Daniela Polelli chi traballant cun FamilySearch. Cun s'addòbiu tituladu "Comente leghere sos paperis antigos" s'at a sighire s'àndala chi nos batit a cumprendere comente si chircant sos antepassados nostros, pro connoschere mègius sas raighinas nostras e comintzare dae printzìpiu una chirca genealògica.

Non b'at bisòngiu de peruna connoschèntzia particulare pro podet partetzipare a s'addòbiu.

14/04/2015 09:30 Archìviu de Istadu de Nùgoro - bia A. Mereu, 49

as-nu@beniculturali.it


___________________________________


"Coralidade e Traditzione"
 s'Archìviu de Istadu in sa Festa Manna de sos nugoresos


Pro sa de 113 editziones de sa festa Manna de sos nugoresos, Su Redentore, s'Archìviu de Istadu de Nùgoro, in collaboratzione cun s'Isportellu Linguìsticu, at ammaniadu unu addòbiu de prètziu.
Sa "Tzitade de sos Coros" at àpidu sa possibilidade de gosare de sa balentia de su Coro de Uri in sa manifestatzione "Coralidade e
 Traditzione"  de su 23 de austu de ocannu.                                           Sa manifestatzione est istada inaugurada dae  sa Diretora de s'Archìviu Angela Orani, chi at torradu gràtzias a totu su pùblicu e a sas autoridades de  Uri e de Nùgoro; posca at presentadu su Coro, su reladore Gianpaolo  Mele Corriga e at dadu sa paràula a su Sìndigu de Nùgoro e a s'Assessore de sa Cultura chi ant bantadu sa bellesa e sa traditzione de sa mùsica corale. Su Coro at introduidu s'interventu de Gianpaolo Mele Corriga:"Excursus subra de sa coralidade noa" e at torradu a cantare a pustis de sa relata, totu sas cantones de su programma ma finas àteras, paris cun cantadores de coros nugoresos chi sunt addobiados a los intèndere, e ghiados peri dae su Maistru Mele matessi. Sas boghes chi si sunt intesas fiant de òmine, ma sas fèminas ant fatu sa parte issoro, ispantende·nos cun sa bellesa e sa richesa de su costùmene de Uri, bestidu cun garbu dae tres pitzinnas de sa bidda.





Presentada de su Libru “CORO” de Edmondo De Amicis
bortadu in limba sarda

Pro sas manifestatziones de sa “Festa della Donna” de ocannu, su 13 de martzu in sa Sala de istùdiu de s’Archìviu de Istadu, Mariantonietta Piga, tradutora e operadora linguìstica de s’Archìviu de Istadu, at presentadu su libru “Coro” de Edmondo de Amicis bortadu in sardu e nd’at letu carchi pàgina.


Nessun commento:

Posta un commento